Сурет: Қазақстан шахмат федерациясы
Қазақстан әйелдер құрамасы 46-шы шахмат Олимпиадасының жетінші турында Қытай командасымен тең түсті. Көшбасшылар матчы 2:2 есебімен аяқталды, деп хабарлайды Қазақстан шахмат федерациясының баспасөз қызметі.
Төртінші тақтада команданың ең жас қатысушысы, 16 жасар Елназ Қалиахмет жеңіске жетті. Бибісара Асаубаева Чжу Цзиньэрмен, Алуа Нұрман Сун Юйсиньмен тең түсті. Меруерт Қамалиденова Лу Мяоиге жол берді.
«Қытай, әрине, өте күшті команда. Барлық шахматшылар өте берік ойнайды, оларды сындыру қиын. Маған қарсыласымды дебюттегі қателікке ұстау сәті түсті, соның арқасында партияны жеңдім. Командаға ұпай әкеле алғаныма өте қуаныштымын», — деп айтып берді Елназ Қалиахмет.
Қазақстан–Қытай матчы жетінші турдың орталық қарсыласуларының бірі болды. Кездесу алдында екі құрама да алдыңғы алты матчтың барлығын жеңіп, 12 командалық ұпайға ие болып, турнир кестесінде бірінші және екінші орындарда тұрған еді. Тең нәтиже екі команданың жеңіс серияларын үзіп тастады, бірақ оларға көшбасшылықты сақтауға мүмкіндік берді.
Сурет: Қазақстан шахмат федерациясы
Жеті турдан кейін екі команданың да активінде алты жеңіс пен бір тең нәтиже бар, қорында 13 командалық ұпай. Қосымша көрсеткіштер бойынша Қытай турнир кестесінде бірінші орында, Қазақстан — екінші. Артынан 12 ұпай жинаған бес құрама тұр: Үндістан, Болгария, Грузия, Армения және Моңғолия.
Қазақстан ерлер құрамасы жетінші турда Сербиямен кездесіп, 0,5–3,5 есебімен ұтылды. Алдияр Ансат Велимир Ивечпен тең түсті. Денис Махнёв, Сауат Нұрғалиев және Даниял Сапенов өз кездесулерін өз пайдасына шешпеді. Қазақстан құрамасының көшбасшысы Денис Махнёвке қарсылас ретінде қазақстандық шахмат әуесқойларына жақсы таныс гроссмейстер Алексей Сарана шықты. Ол Қазақстандағы турнирлерде жиі өнер көрсетеді, 2025 жылы «Владимир Дворкович мемориалы – Aktobe Open» турнирін жеңіп, 2025 және 2026 жылдары қатарынан екі рет Алматыдағы KazChess Masters жеңімпазы атанған.
Шахмат Олимпиадасының төрт туры қалды. Сегізінші турда Қазақстан әйелдер құрамасы өткен Олимпиада жеңімпазы — Үндістан командасымен (бірінші старттық нөмір) кездеседі, ал ерлер құрамасы Босния және Герцеговина командасымен (59-шы старттық позиция) ойнайды.
