Сурет: AI SPORT TECH EVENT ұйымдастырушылары
Спорттың жақын болашақтағы келбеті қандай болмақ? Бұл сұрақтың жауабы Астанада өткен AI SPORT TECH EVENT шарасында көрсетілді.
Іс-шарада кәсіби спорт, ғылым, білім беру және технология саласының өкілдері жасанды интеллектінің жаттығу үдерісін, спорттық білім беруді, оңалтуды және бұқаралық спортты қалай жаңа деңгейге шығара алатынын талқылады.
Шараның маңызды жаңалығының бірі — AI SPORT пен Қазақ ұлттық спорт университеті арасындағы ынтымақтастықтың басталуы. Кездесу аясында тараптар спорт, ғылым және жасанды интеллект салаларындағы өзара әріптестік туралы меморандумға қол қойды.
Бұл серіктестік университеттің ғылыми, білім беру және спорттық тәжірибесін AI SPORT-тың технологиялық мүмкіндіктерімен ұштастыруды көздейді. Университет базасында тараптар машиналық оқыту, компьютерлік көру және деректерді талдау технологияларына негізделген шешімдерді бірлесіп әзірлеп, сынақтан өткізуді, спорттық дайындық, биомеханика және бұқаралық спорт бағыттарында зерттеулер жүргізуді жоспарлап отыр.
Ынтымақтастықтың тағы бір бағыты — AI SPORT технологияларына ғылыми баға беру. Университет мамандары жаттығуларды бағалау әдістемелерін әзірлеуге, алгоритмдердің дәлдігін тексеруге, сондай-ақ платформа нәтижелерін жаттықтырушылар мен ғалымдардың сараптамалық бағасымен салыстыруға қатысады. Келісілген AI SPORT модульдерін университеттің оқу және жаттығу үдерісінде сынақтан өткізу де жоспарланған.
Сондай-ақ спорт пен IT тоғысында еңбек ететін жаңа буын мамандарын даярлауға көңіл бөлінеді. Студенттерге жасанды интеллект, ML және спорттық технологиялар саласында тәжірибеден өтуге, тағылымдамадан өтуге, ғылыми-зерттеу және студенттік жобаларға қатысуға мүмкіндік беріледі. Ал AI SPORT өз тарапынан IT және ML мамандарын тарту, оқыту және студенттерге тәлімгерлік ету жұмыстарын ұйымдастырады.
Алдағы уақытта тараптар бірлескен ғылыми жарияланымдар мен әдістемелік материалдар әзірлеуді, гранттарға өтінім беруді және университет базасында спорттық технологиялар мен жасанды интеллект бойынша бірлескен зертхана құру мүмкіндігін қарастыруды жоспарлап отыр.
Сурет: AI SPORT TECH EVENT ұйымдастырушылары
Спорттық білім беруден AI технологияларына дейін
Қазақстанда спортты дамыту үшін цифрлық технологияларды қолдану мүмкіндіктері туралы Туризм және спорт вице-министрі Бауржан Рапиков сөз сөйледі. Оның баяндамасында отандық технологиялық шешімдерді дамыту және жасанды интеллектіні спорт индустриясына енгізу мәселелері қозғалды.
Қазақ ұлттық спорт университетінің ректоры Тұрсынзада Қуанғалиева болашақтағы спорттық білім беру және ғылым, технология мен тәжірибенің өзара сабақтастығы туралы айтты. Университеттердің маман даярлаумен қатар, спорт саласына цифрлық шешімдерді енгізудегі рөлі де талқыланды.
Жасанды интеллектіні жаттығу үдерісінде практикалық қолдану мүмкіндігін жаттықтырушы Александр Ерасименко көрсетті. AI SPORT LIVE DEMO барысында қатысушылар смартфон камерасы арқылы технологияның адамның қимыл-қозғалысын танып, жаттығу қайталауларын санап, орындалу техникасын бағалай алатынына көз жеткізді.
Қазақ ұлттық спорт университетінің фитнес индустриясы бойынша сарапшысы Тимур Ибрагимов технологияларды оңалту саласында қолданудың практикалық мүмкіндіктерін таныстырды. Атап айтқанда, денеге түсетін жүктемеден және жарақаттан кейінгі қалпына келу, жарақаттың алдын алу және спортпен қауіпсіз айналысуға мүмкіндік беретін цифрлық шешімдер туралы баяндады.
Қазақ ұлттық спорт университетінің AI бағытындағы ғылыми қызметкері Айбике Өскенбай спортшыларды дамытуға арналған цифрлық экожүйе — SportAI жобасын таныстырды. Ол жасанды интеллект пен деректерге негізделген мониторинг, жаттығуларды жекелендіру және спортшыны кешенді дамыту мүмкіндіктеріне тоқталды.
Бұқаралық спортқа AI не үшін қажет?
AI SPORT TECH EVENT шарасының негізгі оқиғаларының бірі — қазақстандық AI SPORT платформасының таныстырылымы болды.
Технология кәдімгі смартфон камерасы арқылы адамның қимыл-қозғалысын танып, жаттығулардың қайталану санын есептеп, қосымша датчиктерсіз-ақ нәтижелерді тіркей алады.
Платформаның мүмкіндіктері шара барысында тікелей көрсетілді. Қатысушылар технологияны өздері сынап көріп, жасанды интеллектінің жаттығулардың орындалуын нақты уақыт режимінде қалай танып-білетінін көрді.
AI SPORT жобасының негізін қалаушы Ғабит Салтыбаев цифрлық шешімдердің спортпен айналысуға деген кедергілерді азайтып, адамдарды тұрақты дене белсенділігіне көбірек тартуға қалай мүмкіндік беретінін айтты.
«Біздің мақсатымыз — адам спортпен айналысуға мүмкіндік іздейтін модельден спорттың кез келген жерде қолжетімді болатын моделіне көшу. Қазір смартфон миллиондаған адамның қолында. Ал жасанды интеллект оны жай ғана контент көруге арналған құрылғыдан дене белсенділігіне арналған құралға айналдыруға мүмкіндік береді. Біз үшін технологияның адамның бір рет жаттығуымен шектелмей, өз прогресін бақылауына, жарысуына және тұрақты түрде спортпен айналысу әдетін қалыптастыруына көмектесуі маңызды. Бұдан бұқаралық спортты дамыту үшін үлкен мүмкіндік көріп отырмыз», — дейді AI SPORT жобасының негізін қалаушы Ғабит Салтыбаев.
Жеке технологиялардан бірыңғай спорттық экожүйеге дейін
AI SPORT TECH EVENT шарасының негізгі тақырыптарының бірі — технология, білім беру, кәсіби және бұқаралық спортты бірыңғай цифрлық ортаға біріктіру мәселесі болды.
Жасанды интеллект қазірдің өзінде адамның қимыл-қозғалысын танып, жаттығулардың орындалуын талдай алады. Ал алдағы уақытта жиналған деректер жаттығуларды жекелендіруге, нәтижелер динамикасын бағалауға және спортшылар, жаттықтырушылар мен спорт ұйымдарына арналған жаңа құралдарды жасауға мүмкіндік береді.
AI SPORT TECH EVENT спорттың болашағы, цифрландыру және жастарды спортқа ынталандыру мәселелері талқыланған ашық диалогпен қорытындыланды.
AI SPORT туралы
AI SPORT — жаттығуларды жасанды интеллект арқылы танып, нәтижелерді тіркеуге мүмкіндік беретін қазақстандық бұқаралық спортқа арналған мобильді платформа.
Пайдаланушылар жеке және командалық спорттық челлендждерге қатысып, нәтижелерін бақылап, өзара жарыса алады.
