20 жасқа дейінгі қыздар арасындағы әлем чемпионы Флюра Хасанова кубогына арналған «Маралсай-2026» халықаралық балалар шахмат турнирі аяқталды. 14 жасқа дейінгі турнирдің жеңімпазы Дастан Бақытбек атанса, 10 жасқа дейінгі санатта бірінші орынды Өзбекстан өкілі Шохжахон Сидиков иеленді, деп хабарлайды Қазақстан шахмат федерациясының баспасөз қызметі.
Турнир 18–24 тамыз аралығында Іле Алатауының етегінде, Іле-Алатау ұлттық паркі аумағында орналасқан «Маралсай» демалыс үйінде (Алматы облысы, Талғар ауданы) өтті. Жарыс 1983 жылғы 20 жасқа дейінгі қыздар арасындағы әлем чемпионы Флюра Хасанова кубогына арналған. Флюра Хасанова – қазақстандық шахматшы, әйелдер гроссмейстері және FIDE халықаралық төрешісі. Қазақстан құрамасы құрамында бес Әлем шахмат олимпиадасында (1992, 1994, 1996, 2000 және 2004 жылдары) өнер көрсеткен. 2001 жылы FIDE халықаралық төрешісі атағын алған. Айта кетейік, Флюра Хасанова алтыншы кезеңнің бас төрешісі болды. Ал турнирдің өзі 20-шы рет өткізіліп отыр.
««Маралсай» – биылғы Қазақстан Балалар кубогының алтыншы кезеңі және үлкен тарихы бар турнир. Әсіресе символикалық нәрсе – бізбен бірге қазақстандық шахматтың тірі аңызы Флюра Хасанованың болуы. 1983 жылы Мексикада ол 20 жасқа дейінгі қыздар арасында әлем чемпионы атанған, ал бүгінде жаттықтырушы және халықаралық төреші ретінде шахматта белсенді жұмыс істеуін жалғастыруда. Турнир өткізілген орынды жеке атап өткім келеді. «Маралсай» – еліміздің керемет, көркем бұрышы, мұнда ұйымдастырушылар балалар, ата-аналар мен жаттықтырушылар үшін жайлы жағдай мен өте жылы атмосфера жасай алды. Турнир кезінде мен ата-аналармен, жаттықтырушылармен және төрешілермен кездестім, олардан жарысты ұйымдастыру туралы жақсы пікірлер естідім», – деп атап өтті Қазақстан шахмат федерациясының вице-президенті Марат Есенов.
Турнирге 6–14 жас аралығындағы 200-ге жуық жас шахматшы қатысты. Кезеңге халықаралық сипат берген – Қырғызстан, Латвия, Тәжікстан және Өзбекстаннан келген жас шахматшылардың қатысуы.
«Сегіз күн бойы мұнда өте қызықты күрес жүрді. Төрешілер алқасы үшін әсіресе маңыздысы – турнир жоғары деңгейде, шағымдар мен апелляцияларсыз өтті. 10 жасқа дейінгі санатта алты жастағы балалар көп болды, оның кейбіреулері Қазақстан чемпионаттарына қатысу тәжірибесіне ие. Бүгінде балалар шахмат деңгейі соншалықты өсті, алты жастағы балалар әлдеқайда ересек қарсыластармен тең күресіп, жеңе алады. Бұл өте қуантады. Көптеген қатысушылар үшін «Маралсай» Қазақстан Балалар кубогының финалына дайындықтың тағы бір маңызды кезеңі болды. Бұл тәжірибе оларға күшейе түсуге, ал болашақта Қазақстанды әлем чемпионаттарында лайықты ұсынуға және медальдар жеңіп алуға көмектеседі деп үміттенемін», – деді жарыстың бас төрешісі Флюра Хасанова.
Дәстүрлі түрде осы кезең аясында швейцариялық жүйе бойынша 9 турдан тұратын екі жеке турнир өтті. Уақыт бақылауы – жылдам классика 60+30 (партияға 60 минут, әр жүріске 30 секунд қосылады, бірінші жүрістен бастап).
А турниріне 14 жасқа дейінгі жас спортшылар қатысты. Бірінші орынды 13 жастағы алматылық Дастан Бақытбек иеленді. Екінші орында – алматылық Арсен Айтмұханов, үшінші орында – 3-ші кезеңнің жеңімпазы Шымкенттен Әлириза Шарафиев.
«Қарсыластар күшті болды, ойнау оңай емес еді, бірақ мен жеңе алдым. Мен шахматпен алты жасымнан бері айналысамын. Өткен жылы 12 жасқа дейінгі Қазақстан чемпионатында екінші орын алдым, бұған дейін 8 жасқа дейінгі Қазақстан чемпионы болдым. Бұл турнир маған өте ұнады. Мұнда жақсы атмосфера болды, шахмат тақтасында ғана емес, қызықты болды. Бос уақытта біз үшін футбол турнирлері, флешмобтар, от басындағы отырыстар ұйымдастырылды, қатысушыларды туған күнімен құттықтады. Сондықтан «Маралсай» тек партиялармен ғана емес, бүкіл турнир атмосферасымен есте қалды», – деп әңгімеледі жеңімпаз Дастан Бақытбек.
Б турнирінде 10 жасқа дейінгі жас шахматшылар жеңіс үшін күресті. Мұнда жеңіске Өзбекстаннан келген спортшы Шохжахон Сидиков жетті. Екінші орында – Шымкенттен Айару Нұрбол, үшінші орында – үш кезеңнің жеңімпазы Атырау облысынан Әли Атнаш.
Командалық есепте бірінші орынды Шымкент жас шахматшылары, екінші орынды – Алматы командасы, үшінші орынды – Атырау облысы иеленді. Кезеңнің жүлде қоры 3 млн теңге болды.
«Маралсай-2026» турнирі – Қазақстан Балалар кубогының алтыншы кезеңі. Қазірдің өзінде төртінші жыл қатарынан көпкезеңді ересектерге арналған Қазақстан кубогымен қатар Қазақстан шахмат федерациясы Балалар кубогын өткізіп келеді. 2026 жылы ол алты кезең мен финалдан тұрады, финал 1–13 желтоқсан аралығында Астанада өтеді.
«Маралсай-2026» халықаралық балалар шахмат турнирін Қазақстан шахмат федерациясы Алматы қаласы әкімдігі мен Freedom компаниялар тобының, сондай-ақ Шин-Лайн компаниялар тобы, «Маралсай» отбасылық және корпоративтік демалыс кешені, Zigi Zagi, RAMS Qazaqstan, BUTA Group, BI Group құрылыс компанияларының қолдауымен өткізеді. Ақпараттық серіктестер: «Еуразия» Бірінші арнасы, DK News, Ult.kz, Sportinform.kz, Sport+, Qazsport, NewTimes, Bes.media, «Курсив», BestNews, «CHESSNO говоря».
